دستار کیا کریں گے اگر سر نہیں رہا

۔۔۔۔۔۔۔۔۔غزل۔۔۔۔۔۔۔۔۔۔۔

دستار کیا کریں گے اگر سر نہیں رہا

اب تو جناب صبر کا منظر نہیں رہا

جو خود کا پیٹ کاٹ کے اوروں کو بخش دے

ایسا کوئی خلوص کا پیکر نہی رہا

مایوس ہوکے چینخ اٹھیں عصمتیں تمام

کیا اب کوئی زمانے میں حیدر نہیں رہا

 جو شخص دوسروں کو گراتے ہوئے بڑھے

وہ شخص کامیاب کہیں پر نہیں رہا

 آؤ ستمگرو ذرا دیکھو مرا جگر

مقتل میں آگیا ہوں مجھے ڈر نہیں رہا

قسمت غریب گھر کو نہ تکمیل دے سکی

دیوار ہوگئی ہے اگر در نہیں رہا

نام و نشاں مٹادے ہمارا جہان سے

ایسا کوئی زمانے میں لشکر نہیں رہا

جب سے اسے معاف کیا ہے خلوص سے

اب کوئی بوجھ بھی مرے دل پر نہیں رہا

اس شہر خوش گماں میں نذیری مزہ نہیں 

کوئی بھی اپنے قد کے برابر نہیں رہا

                            مسیح الدین نذیری                                    

                                  9321372295