نعتِ پاک
درسِ اخلاق دیا رب کی شریعت بخشی
میرے سرکار نے انسان کو عظمت بخشی
کوئی معراج میں سرکار کا رتبہ دیکھے
عرش پہ خالقِ عالم نے ضیافت بخشی
کیا کہیں گر اسے قدرت کا طمانچہ نہ کہیں
کنکروں نے بھی ابو جہل کو ذلت بخشی
ہو مبارک تیرا یثرب سے مدینہ ہونا
’’خاکِ پائے شہِ کونین نے عزت بخشی‘‘
افضلیت کے لئے صرف یہی کافی ہے
خود ابوبکر کو آقا نے امامت بخشی
آپ کی مرضی و منشاء پہ ہو قرآں کا نزول
اے عمر آپ کو اللہ نے وہ رفعت بخشی
شاہِ کونین سے نورین کا تمغہ پایا
ایسی عثمان کو اللہ نے قسمت بخشی
کانپ کر رہ گئے کفار کے دل سینے میں
تیغِ کرار کو اللہ نے وہ طاقت بخشی
چوم لوں آنکھ نذیریؔ تیری دل کرتا ہے
تجھ کو اللہ نے طیبہ کی زیارت بخشی
کوئی تبصرے نہیں:
ایک تبصرہ شائع کریں