مجھ پہ جب حملہ كيا تها گردشِ ایام نے
بن کے رحمت آگئے تم ہاتھ میرا تھامنے
میری دنیا تھی کسی بنجر جزیرے کی طرح
زندگی کا رنگ بھر ڈالا تمہارے نام نے
لوگ افسردہ تھے مجھ پر دیکھتے تھے جب ستم
کردیا حیرت زدہ لیکن حسیں انجام نے
تم پہ جب منڈلارہی تھی ہم نے دیکھا غور سے
تتلیوں کا رنگ پھیکا تھا تمہارے سامنے
اب وہی ہے شام لیکن زندگی کچھ اور ہے
ورنہ کتنا دل گرفتہ کردیا تھا شام نے
زندگی کا لطف صبح و شام کی رعنائیاں
بخش دی ہیں قدرتِ باری کے اک انعام نے
آج بھی کانوں میں میرے گھولتی ہیں رس جناب
بات ہی ایسی کہی اک دن کسی گلفام نے
دیکھئے کیسے نذیریؔ کو نئی اک زندگی
دیدیا ساغر نے مینا نے چھلکتے جام نے
مسیح الدین نذیری
کوئی تبصرے نہیں:
ایک تبصرہ شائع کریں