۔۔۔۔۔۔۔۔۔۔۔غزل۔.۔۔۔۔۔۔۔۔۔۔۔
ذرے کو آسمان کا پیوند کردیا
اے عشق تونے مجھ کو ہنر مند کردیا
گھر میرے آپ آگئے اللہ رے نصیب
خوشیوں کو میری آپ نے دوچند کردیا
راضی تو دل نہ تھا کہ جھکاؤں میں اپنا سر
لیکن ضرورتوں نے رضامند کردیا
گھر میں تھیں میرے چند تعصب کی کھڑکیاں
کل دل پہ جبر کر کے انھیں بند کردیا
منظر کئی تھے اور مگر ہم نے تیرے بعد
اپنی نظر کو تیرا ہی پابند کردیا
گھر سے مجھے نکال رہا ہے بتا تو دے
مجبور تجھ کو کس نے اے فرزند کردیا
میں قتل جب ہوا تھا کئی چشم دید تھے
سب کا امیرِ شہر نے منہ بند کردیا
تاثیر اس زباں کی نذیری عجیب ہے
اردو نے تلخیوں کو بھی گل قند کردیا
مسیح الدین نذیری
کوئی تبصرے نہیں:
ایک تبصرہ شائع کریں