۔۔۔۔۔۔۔۔۔۔ غزل 5 ۔۔۔۔۔۔۔۔۔۔۔۔
اپنی ناکامی پہ کافی دیر تک رویا گھمنڈ
جب نہیں کر پایا میری ذات پر قبضہ گھمنڈ
جو زمیں پر اپنا ماتھا ٹیکتا رہتا ہے روز
تجربہ شاہد ہے وہ بندہ نہیں کرتا گھمنڈ
ناز ہے تدبیر پر تجھ کو مجھے تقدیر پر
دیکھتے ہیں ٹوٹتا ہے آخرش کس کا گھمنڈ
اس لئے بھی روز قبروں کی زیارت کیجئے
سب کو جب آنا یہیں پر ہے تو پھر کیسا گھمنڈ
دے رہے ہیں دونوں دستک دل کے دروازے پہ آج
مرحبا اے انکساری اور تجھ کو نا گھمنڈ
میں ہمیشہ سے مخالف ہوں علی الاعلان ہوں
ہو نہیں سکتا کبھی تجھ سے مرا رشتہ گھمنڈ
تو دیا کرتا ہے لاکر دور انساں کو فریب
جانتا ہوں تجھ سے ملتا ہے سدا دھوکہ گھمنڈ
یہ تعارف ہے برے لوگوں کی تو پہچان ہے
تجھ کو کوئی بھی کبھی اچھا نہیں کہتا گھمنڈ
یہ نذیری کردیا کرتا ہے شہروں کو تباہ
کردیا کرتا ہے ملکوں کو تہ و بالا گھمنڈ
مسیح الدین نذیری پورہ معروف مئو
کوئی تبصرے نہیں:
ایک تبصرہ شائع کریں