کبھی پلٹ کے خوشی کی طرف نہیں دیکھا

غزل

کبھی پلٹ کے خوشی کی طرف نہیں دیکھا
اسیرِ غم تھے ہنسی کی طرف نہیں دیکھا
ہمہیں سکت نہ تھی کہنے کی اور اس نے بھی
 ہماری تشنہ لبی کی طرف نہیں دیکھا
وہ جس کے واسطے کاٹا ہے زندگی کا سفر
بوقت نزع اسی کی طرف نہیں دیکھا
جناب شیخ کو غم ہے اثر نہ ہونے کا
کبھی سخن کی کجی کی طرف نہیں دیکھا
مگن ہم اتنے ہوئے نیکیاں کمانے میں
کسی کی فاقہ کشی کی طرف نہیں دیکھا
محبتوں کے اجالوں میں جب سے آئے ہیں
 پلٹ کے تیرہ شبی کی طرف نہیں دیکھا
تمہارا شہر نذیری عجیب ہے جس میں
  کسی نے مڑ کے کسی کی طرف نہیں دیکھا