زندگی اب پھر سے تیری رہ گذر دیکھے گا کون

 

زندگی اب پھر سے تیری رہ گذر دیکھے گا کون
رنگ دیکھ آئے تمہارا اب  اُدھر دیکھے گا کون

 کھو کے ساری عمر اب سمجھا ہے دنیا کا فسوں
چیز جو بے مول ہو اس چیز پر دیکھے گا کون

 پھر وہی دیوار و در آنگن  وہی تنہائیاں
شام کو گھر لوٹ کر آئیگا گھر دیکھے گا کون

مسکنت ٹھوکر ستم افسردگی محرومیت
صاف ہے مفلس کے چہرے پر مگر دیکھے گا کون

روشنی خیرہ کئے دیتی ہے آنکھیں آجکل
اب کسی مجبور کا درد جگر دیکھے گا کون

مر گیا ذوق تجسس کٹ گئی شاخِ طلب
زندگانی کے اجالوں کا سفر دیکھے گا کون

ہاں نذیری دیکھنے کی چیز ہے دنیا مگر
وقت آخر ہے تو اب المختصر دیکھے گا کون

             مسیح الدین نذیری