بہار چاندنی خوشبو گلاب کیا کیا ہے

بہار چاندنی خوشبو گلاب کیا کیا ہے
اے مہ جبین تمہارا خطاب کیا کیا ہے
چمن، بہارِ  چمن اور خمار و رعنائی
تمہارے نام بتا انتساب کیا کیا ہے
تڑپ فراق کسک درد رتجگے آنسو
بس ایک عشق کیا تھا عذاب کیا کیا ہے
 کچھ التفات ہو حاصل تو پھر بیان بھی ہو
کسی کی ڈوبتی آنکھوں میں خواب کیا کیا ہے
کوئی بتانہیں سکتا کہ چشمِ ناز ان کی
حیا سرور تکلم حجاب کیا کیا ہے
 حیات بخش  سحر خیز اور فسانہ نگار
تجھے پتہ نہیں تیرا شباب کیا کیا ہے
 کنول چمیلی و ریحان یاسمن عنبر
ادب میں تیرے لئے انتخاب کیا کیا ہے
سروں کے ساتھ وہ اک نقرئی ہنسی تیری
مٹھاس ساز ترنم رباب کیا کیا ہے
ترے وجودِ بلا خیز کے تموج میں
سرور ساغر و مینا شراب کیا کیا ہے
نگاہِ شوخ کی گہرائیوں کو کیا کہئے
بیاس ستلج و راوی چناب کیا کیا ہے
چراغ روشنی مہتاب افتاب نجوم
کتاب اک ترا چہرا ہے باب کیا کیا ہے
وہ شب کو نیند نہ آنا وہ بے شکن بستر
اس ایک فرقت شب کا حساب کیا کیا ہے.
وصال قرب طمانیت  التفات سکون
محبتوں میں نذیری سراب کیا کیا ہے

                   مسیح الدین نذیری