” میں کس سے کہتا کوئی ہم زبان تھا ہی نہیں “
کلام ۔ حافؔظ معروفی
زمیں خلاف عدو آسمان تھا ہی نہیں
ہے آج جیسا کبھی کبھی امتحان تھا ہی نہیں
چمن کی فکر گلوں کا دھیان تھا ہی نہیں
وطن کا ایسا کبھی پاسبان تھا ہی نہیں
ہمیں نہ ہوتے تو کرتے وہ کس پہ مشق ستم
ہماری طرح کوئی سخت جان تھا ہی نہیں
اسی بیان پہ مجرم بنا دیا مجھکو
کسی بھی طرح جو میرا بیان تھا ہی نہیں
شکار ہوتا نہ کیونکر میں اسکی سازش کا
وہ بدگمان تھا میں بدگمان تھا ہی نہیں
کبھی نگاہ میں اسکی کبھی میں دل میں رہا
ہمارا اور تو کوئی مکان تھا ہی نہیں
دکان اپنی اٹھا لائے تیرے کوچے سے
تری گلی میں کوئی قدردان تھا ہی نہیں
بھروسہ ہم نے کیا صرف اپنے بازو پر
ہمارا اور کسی پر گمان تھا ہی نہیں
گلوں نے دکھڑا سنا عندلیب گلشن کا
میں کس سے کہتا کوئی ہم زبان تھا ہی نہیں
کہاں سے چاند ستارے تمہیں نظر آتے
جہاں کھڑا تھا وہاں آسمان تھا ہی نہیں
ہمارے ساتھ وہ رشتہ نبھانے آیا تھا
زباں پہ اسکی مگر بھائی جان تھا ہی نہیں
کفن بدوش گیا جب محاذ پر دیکھا
دھواں دھواں تھا کہیں آسمان تھا ہی نہیں
مجھے نکال کے پچھتا رہا ہے وہ حاؔفظ
نہیں رکوں گا میں اس کوگمان تھا ہی نہیں
کوئی تبصرے نہیں:
ایک تبصرہ شائع کریں