ہم اپنی ذات میں گر اعتکاف کرلیتے

تازہ ترین جام و مینا سلسلہ ۔ 10
۔۔۔۔۔۔۔۔۔۔۔۔۔۔۔غزل۔۔۔۔۔۔۔۔۔۔۔۔۔۔

ہم اپنی ذات میں گر اعتکاف کرلیتے
خود اپنے دل کو خرد کا مطاف کرلیتے

پھر اس کے بعد اترتی خدا کی رحمت بھی
دعا سے پہلے ذرا دل کو صاف کرلیتے

اترتیں روز وہاں رنگ و نور کی پریاں
ہم اپنے آپ کو گر کوہِ قاف کرلیتے

ہمارے ہاتھ میں ہوتے ہمارے رشتے بھی
ذرا سا اپنی انا میں شگاف کرلیتے

خدا کی مرضی و منشا پہ گر جئے ہوتے
بھنور خود آکے ہمارا طواف کرلیتے

ہمیں بھی اس سے تعلق تھا واجبی ہی سہی
تو کیا برا تھا اگر اعتراف کرلیتے

بلند اور بھی ہوجاتا قد صداقت کا
امیرِ شہر سے گر اختلاف کرلیتے

ہمیں بھی آتی سیاست اگر تو یوں ہوتا
کہ وقت وقت پہ خود کو غلاف کرلیتے

کسی میں واقعی اخلاص گر نظر آتا
تو اس سے خود کو نذیری مضاف کرلیتے

مسیح الدین نذیری پورہ معروف مئو