چاند کو جاکر پسِ تالاب مت دیکھا کرو
جو تمہیں تکلیف دے وہ خواب مت دیکھا کرو
درد کا احساس بڑھ جائیگا اس سے اور بھی
مشکلوں میں جانبِ احباب مت دیکھا کرو
رنگ و روغن پر نہ جاؤ زندگی کچھ اور ہے
شخصیت دیکھا کرو القاب مت دیکھا کرو
عشق خود استاد ہے تم کو سکھادیگا شعور
تم کتابوں میں لکھے آداب مت دیکھا کرو
اور بھی کچھ رنگ ہیں اس زندگانی کے جناب
صرف اس کا خوبصورت باب مت دیکھا کرو
زندگی بھر یوں ہی رہ جاؤگے خالی ہاتھ تم
دور سے بیٹھے ہوئے مہتاب مت دیکھا کرو
اپنی ہی تصویر آئیگی نظر الٹی تمہیں
اپنی پرچھائیں کو زیرِ آب مت دیکھا کرو
غیر سے وہ بے تکلف ہوکے دیتا ہے عذاب
اس کی جانب اے دلِ بے تاب مت دیکھا کرو
بس نذیری عزم محکم ہو خدا کا نام ہو
حوصلے دیکھا کرو اسباب مت دیکھا کرو
مسیح الدین نذیری
کوئی تبصرے نہیں:
ایک تبصرہ شائع کریں