سارے آداب سکھادوں گا مرے ساتھ چلو
عشق کے راز بتا دوں گا مرے ساتھ چلو
ہوش آئیگا نہ تاعمر کبھی پھر تم کو
میں تمہیں ایسی پلادوں گا مرے ساتھ چلو
دل میں چاہت کی جو تھوڑی سی کسک جاگی ہے
میں اسے اور ہوادوں گا مرے ساتھ چلو
ہاتھ خالی ہیں مگر دل ہے محبت کا امیر
یہ نہ سوچو تمہیں کیا دوں گا مرے ساتھ چلو
دور اس مطلبی دنیا سے بہت دور کہیں
شہر چاہت کا بسا دوں گا مرے ساتھ چلو
بے نشاں یوں ہی بھٹکتے ہوئے رہ جاؤگے
منزلِ عشق دکھادوں گا مرے ساتھ چلو
شہرِ احساس میں لے جاکے نذیری اک دن
پردہ زیست اٹھادوں گا مرے ساتھ چلو
کوئی تبصرے نہیں:
ایک تبصرہ شائع کریں