سر سے تا پاؤں وہ پاکیزہ رداؤں والی

۔۔۔۔۔۔۔۔۔۔۔۔۔غزل۔۔۔۔۔۔۔۔۔۔۔۔۔۔۔

 سر سے تا پاؤں وہ پاکیزہ رداؤں والی

کھوگئی وقت کی تصویر حیاؤں والی

پھر وہی پہلے سی خوش رنگ فضاؤں والی

بات کر پیار کی لچکیلی اداؤں والی

اور بھی آئے بہت سارے سہانے موسم 

بات پائی نہ تری زلف کے چھاؤں والی

جس پہ دل کھنچ کے چلا آتا ہو ہولے ہولے

شہر میں کون سی وہ چیز ہے گاؤں والی

کوئی اس رشتہ الفت کو نہیں پاسکتا

بے خودی لائیگا کیسے کوئی ماؤں والی

ہم نہیں بدلے ہیں تم لوٹ کے آسکتے ہو

ہم میں عادت ہے وہی اب بھی وفاؤں والی

روٹھنا،  بھاگنا شرمانا بدکنا ڈرنا

کیا ادائیں ہیں تری ہوشرباؤں والی

صحن میں اتنی بہاریں ہیں نذیری اپنے

یاد کیا آئے گی رت ہم کو خزاؤں والی

         مسیح الدین نذیری

                          9321372295