۔۔۔۔۔۔۔۔۔۔۔نعت پاک ۔۔۔۔۔۔۔۔۔۔۔۔۔۔
فضائے شہر معطر کی بات کرنی ہے
نبی کے روضہ اطہر کی بات کرنی ہے
اے سننے والو وضو کرکے با ادب بیٹھو
مجھے خدا کے پیمبر کی بات کرنی ہے
ملک بھی آئیں گے بیشک میری سماعت کو
کہ دو جہان کے سرور کی بات کرنی ہے
گناہ گار دلوں کو سکوں ملے گا ضرور
کہ مجھ کو شافع محشر کی بات کرنی ہے
یہ میری بزم بھی مہکے گی دل بھی جھومے گا
نبی کے خلق معطر کی بات کرنی ہے
جہاں پہ جاکے جبیں آسماں کی جھکتی ہے
مجھے نبی کے اسی در کی بات کرنی ہے
مقام حضرت صدیق خود عیاں ہوگا
کہ غار ثور کے منظر کی بات کرنی ہے
عمر کا ذکر چلا آئیگا یہاں کھنچ کر
دعائے ساقی کوثر کی بات کرنی ہے
سخاوتوں کا اثر اب بھی ہے مدینے میں
غنی کے رتبہ برتر کی بات کرنی ہے
بنام قوم نئی روح پھونکنے کیلئے
جناب فاتح خیبر کی بات کرنی ہے
زباں پہ ذکر نذیری ہے شاہ والا کا
تو کس کو مشک کی عنبر کی بات کرنی ہے
مسیح الدین نذیری
کوئی تبصرے نہیں:
ایک تبصرہ شائع کریں