میں اس کو کرکے اشارا نہیں بلاؤں گا

۔۔۔۔۔۔۔۔۔۔۔۔غزل۔۔۔۔۔۔۔۔

میں اس کو کرکے اشارا نہیں بلاؤں گا

چلا گیا تو دوبارا نہیں بلاؤں گا

چلا گیا تو خسارا مرا بھی ہے لیکن

میں جھیل لوں گا خسارا نہیں بلاؤں گا

اسی زمیں سے مجھے روشنی اگانی ہے

میں آسمان سے تارا نہیں بلاؤں گا

مرے بڑھاپے کی لاٹھی بنے میرا بیٹا

میں اور کوئی سہارا نہیں بلاؤں گا

میں کیا کروں کہ مجھے منتیں نہیں آتیں

میں اس، کو کہہ کے "خدارا" نہیں بلاؤں گا

میں ڈوب جاؤں گا موجوں کا سامنا کرکے

مگر میں جھک کے کنارا نہیں بلاؤں گا

بلاؤں جھک کے نذیری اسے تو آئیگا 

مجھے نہیں ہے گوارا نہیں بلاؤں گا 

مسیح الدین نذیری پورہ معروف مئو

             naziriqasmi.blogspot.com