آجائیے اب آپ بھی الفت کے جہاں تک

#(نذیریات(10

۔۔۔۔۔۔۔۔۔۔غزل۔۔۔۔۔۔۔۔۔۔۔۔

آجائیے اب آپ بھی الفت کے جہاں تک

تنہا میں بھلا ساتھ نبھاؤں گا کہاں تک

اس طرح نہ تڑپاؤ نہ اس طرح کرو بات

مر جائیں نہ ہم تیری نہیں سے تری ہاں تک

کچھ اور رہا دل میں زباں پر رہا کچھ اور

تھا کتنا خلا آپ کے دل اور زباں تک

ظاہر پہ بھروسہ تجھے قسمت پہ مجھے ناز

پہونچا نہیں تو اب بھی مرے عزمِ جواں تک

جنت تمنا ہے تجھے پھر تجھے کیا فکر

جا گھر میں محبت کی نظر سے رخِ ماں تک

اے مرے وطن تم پہ کوئی وقت گر آئے

کیا چیز ہیں یہ مال لٹادوں گا میں جاں تک

مطلوب نذیری ہے اگر عظمتِ رفتہ 

پھر لوٹ کے آ جا اسی شمشیر و سناں تک

مسیح الدین نذیری پورہ معروف مئو