وہ میری زیست کی جب سےمٹھاس ہوگئے ہیں

 ۔۔۔۔۔۔۔۔۔۔۔۔۔۔۔غزل۔۔۔۔۔۔۔۔۔۔۔۔۔۔

وہ میری زیست کی جب سےمٹھاس ہوگئے ہیں

تبھی سے ان کے بھی نخرے پچاس ہوگئے ہیں

کہوں تو کیسے کہوں ڈوبتی سی حالت میں

وہ حال اب ہے کہ تنکے بھی آس ہوگئے ہیں

اب ہم سے مل کے نکلتے ہیں راہِ عشق میں لوگ

کتابِ عشق کا ہم اقتباس ہوگئے ہیں

جنابِ شیخ ابھی کچھ نہیں کہا ہم نے

بلا وجہ ہی میاں بدحواس ہوگئے ہیں

اسے ہماری محبت سے کچھ غرض ہی نہیں

پھر اس کے واسطے ہم کیوں اداس ہوگئے ہیں

ہمیں کو دیکھا ہے نو واردوں نے عزت سے

ہم اس جہانِ محبت کی آس ہوگئے ہیں

تمہارے ریشمی پیکر کی یاد کیا آئی 

دھنک سے رنگ مرے آس پاس ہوگئے ہیں

انھیں کا نام زباں پر بوقتِ نزع رہا

ہم امتحانِ محبت میں پاس ہوگئے ہیں

نکلیے گھر سے نذیری چھپا کے چہرے کو

تمام لوگ قیافہ شناس ہوگئے ہیں

مسیح الدین نذیری پورہ معروف مئو