۔۔۔۔۔۔۔۔۔ *بیٹی* ۔۔۔۔۔۔۔۔۔۔
نویدصبح نو پیغام رحمت بن کے آئی ہے
مری بیٹی مرے گھر خیر برکت بن کے آئی ہے
یہ سچ ہے بیٹیاں جب ڈھال ہیں نار جہنم سے
تو پھر وہ میری جنت کی بشارت بن کے آئی ہے
مرے آقا بھی بیٹی کو بہت محبوب رکھتے تھے
مری بیٹی مرے آقا کی سنت بن کے آئی ہے
وفا اخلاص الفت دوستی ایثار و قربانی
مری بیٹی ہر اک شے کی علامت بن کے آئی ہے
خدا خوش جس سے ہو اس گھر میں بیٹی بھیج دیتا ہے
مری بیٹی مرے رب کی عنایت بن کے آئی ہے
ہیں گھر کی رونقیں ان بیٹیوں سے یہ حقیقت ہے
میری بیٹی مرے گھر نور و نکہت بن کے آئی ہے
نبی کہتے ہیں ان کی پرورش کرنا عبادت ہے
تو پھر بیٹی مری , میری عبادت بن کے آئی ہے
سکوں دیتی ہیں کتنا بیٹیاں جب گھر میں ہوتی ہیں
مری بیٹی یقینا میری راحت بن کے آئی ہے
نذیری گھر میں بیٹی ہو تو گھر میں نور ہوتا ہے.
تو گویا میری بیٹی گھر کی زینت بن کے آئی ہے
مسیح الدین نذیری
کوئی تبصرے نہیں:
ایک تبصرہ شائع کریں