کس چیز کی قلت ہے اللہ ترے گھر میں

 ۔۔۔۔۔نعتِ رسول صلی اللہ علیہ وسلم ۔۔۔

کس چیز کی قلت ہے اللہ ترے گھر میں 

کیڑوں کو غذا ان کی پہونچاتاہے پتھر میں

اس شخص کے گھر اکثر چولھا نہیں جلتا ہے

رہتی ہے شہنشاہی جس شخص کی ٹھوکر میں

جو نازِ بلاغت تھے قرآں پہ جنھیں شک تھا

وہ رہ گئے چکرا کر اک سورۂ کوثر میں

اس وقت بھی امت کو بھولے نہ مرے آقا

بیٹھے تھے شبِ اسری جب رب کے برابر میں

خورشید و قمر قرباں سوجاں سے نہ کیوں کر ہوں

کچھ بات ہی ایسی ہے ان کے رخِ انور میں

وہ خلد کی دوزخ ہو وہ عرش کی کرسی ہو

دیکھ آئے تعالی اللہ آقا مرے پل بھر میں

انسان تو انساں ہے با شوق و ادب آکر 

جھکتے ہیں ملائک بھی دربارِ پیمبر میں

خورشیدِ نبوت کی تابندہ شعائیں ہیں

بوبکر میں عثماں میں فاروق میں حیدر میں

یہ نعت کا فن اس دم سمجھیں گے کہ کام آیا

سرکار نذیریؔ جب اپنا کہیں محشر میں

مسیح الدین نذیری پورہ معروف مئو

                     naziriqasmi.blogspot.com