▪طرحی وتعزیتی شعری نشست▪

 ▪طرحی وتعزیتی شعری نشست▪

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایوان ادب" بمقام یاسمین پارک قادر پیلس کوسہ ممبرا ضلع تھانہ (ممبئی) کی دوسری شعری محفل جو طرحی نشست کے لحاظ سے پہلی نشست تھی مورخہ ٣ ستمبر ٢٠٢٣ بروز اتوار  بڑی کامیابی کے ساتھ  اختتام کو پہونچی ،پروگرام کی  نظامت صدیق عمر صاحب اور مسیح الدین نذیری صاحب نے انجام دی، ممبرا کے کہنہ مشق وعظیم شاعر نظر نقشبدی صاحب صدر کی حیثیت سے منتخب کئے گئے

تاریخ ساز استاد شاعر جو" الف نون" کے نام سے ایک  زمانے سے لوگوں کے ذہن ودل پر چھائے رہے اور ہرروز انقلاب میں پابندی کے ساتھ چھپتے رہے یعنی ارتضیٰ نشاط صاحب کے سانحہٴ ارتحال پر طرحی نشست کے ساتھ موصوف کی تعزیت پر بھی خراج عقیدت کے طور پر  کلام پیش کئے گئے  ،اس معنی کر یہ پروگرام دو حصوں میں منقسم رہا "تعزیتی"اور "طرحی" طرح،پر کہے گئے کلام شعراء کے نام کے ساتھ  مندرج ذیل پیش کئے جارہے ہیں بعد میں  تعزیتی کلام کی کچھ جھلکیاں بھی پیش کی جائیں گی ،تلاوت قرآن اور نعتیہ کلام کے بعد سب سے پہلے زبیر گورکھپوری صاحب کی عدم حاضری کے سبب ان کا طرحی کلام فخر عالم خان اعظمی صاحب نے پیش کیا موصوف کے کلام کا یہ دلنشیں شعر حاضر ہے

محبت کے لئے صورت نہیں سیرت ضروری ہے

محبت  کی  تمنا ہے  تو  کر ذوق نظر پیدا

(زبیر گورکھپوری)

۔۔۔۔۔۔۔۔۔۔۔۔۔۔۔۔۔۔۔

شبیر احمد شاد صاحب (بھیونڈی) کسی وجہ سے حاضر نہیں ہوسکے تھے لیکن ان کا کلام پڑھا گیا،شاد صاحب کا یہ نمائندہ شعر آپ کی خدمت میں پیش ہے

بہت  آسان  ہوتا ہے  کسی  سے  دشمنی کرنا

بہت مشکل سے ہوتا ہے کسی کے دل میں گھر پیدا

(شبیر احمد شاد)

۔۔۔۔۔۔۔۔۔۔۔۔۔۔۔۔۔۔۔۔۔

شہرت ادیبی صاحب( بھیونڈی) کے کلام میں مزاح کا پہلو اجاگر رہا سامعین بہت لطف اندوز ہوئے آنجناب کا یہ شعر جس میں عشق مصطفے صلی اللہ علیہ وسلم کی رمق موجود ہے بغور پڑھئے۔

مری  نگاہ  کا بوسہ  لیا  ستارون نے

یہاں میں ہوکے در مصطفے سے آیا ہوں

(شہرت ادیبی)

۔۔۔۔۔۔۔۔۔۔۔۔۔۔۔۔۔۔۔۔۔۔۔

سلیم رشک صاحب کے کلام سے بھی لوگ لطف اندوز ہوئے یہ شعر دیکھئے تقلیدی ذہن سے تعمیری ذہن کی طرف لے جاتا ہے

مرا سفر کسی تقلید کا نہیں کا قائل

یہاں میں اپنی انوکھی ادا سے آیا ہوں

(سلیم رشک)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مومن ہندی صاحب کا یہ شعر عقیدہءتقدیر سے لبریز ہے اور مومن کی شان اجاگر کررہا ہے بالخصوص پہلے مصرع پر غور کیجئے

ستمگروں کے لئے ایک ضرب ہوں مومن

کسی دعا سے کسی بددعا سے آیا ہوں

(آصف مومن ہندی)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ذوالفقار صعیدی صاحب اپنے اس شعر میں پیغام دے رہے ہیں کہ منزل مقصود کو پانے کے لئے پرخار رہگزر کو کس طرح طے کیا جائے یہ شعر پڑھئے اور محسوس کیجئے

جنوں کے ساتھ سینوں میں کریں گے جب شرر پیدا

رہ پرخار میں ہوجائے گا عزم سفر پیدا

(ذوالفقار صعیدی)

۔۔۔۔۔۔۔۔۔۔۔۔۔۔۔۔۔۔۔۔۔۔۔.

دیکھئے اس شعر میں ایاز بستوی صاحب نے ظاہر پرستی کے اس دور میں قوم کو کس طرح آئینہ دکھایا ہے

کھلا یہ عقدہ کہ تھا احترام ظاہر کا

نکل کے جیسے ہی رسم قبا سے آیا ہوں

(ایاز بستوی)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ریا ونمود سے پاک یہ جذبہ قابل قدر ہے دیکھئے تابش رامپوری کا یہ شعر

لہو کے داغ کو اشکوں سے دھولیا میں نے

کسے خبر  ہے کہ  میں  کربلا سے آیا ہوں

(تابش رامپوری)

۔۔۔۔۔۔۔۔۔۔۔۔۔۔۔۔۔۔۔۔۔۔،۔۔۔۔،

توفیق فاخری صاحب کا یہ تضمینی شعر صبروقناعت کا   درس دے رہا ہے

ہے صبروضبط،قناعت ، وفا، طرحداری

"میں اک فقیر ہوں شہر سبا سے آیا ہوں"

(توفیق فاخری)

۔۔۔۔۔۔۔۔۔۔۔۔۔۔۔۔۔۔،۔،۔۔۔۔۔۔۔

شاہین چمن کی ترکیب کا جواب نہیں فخر عالم خان اعظمی صاحب کی یہ تضمین خوب ہے اس میں عزم وحوصلہ کا پیغام مضمر ہے 

یہ شاہین چمن کرلیں جو پرواز ہنر پیدا

تو اوج لامکاں تک ہوں ہزاروں رہگزر پیدا

(فخرعالم خان اعظمی )

۔۔۔۔۔۔۔۔۔۔۔۔۔۔۔۔۔

حالات حاضرہ کی نبض شناسی کرتا ہوا کمال فرخ آبادی کا یہ شعر کمال کا ہے

کوئی حق  بات کہنے کی  کبھی ہمت نہ کرپائے

یہ ظالم کررہے ہیں اس لئے سینوں میں ڈر پیدا

(کمال فرخ آبادی)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

صدیق عمر صاحب ( میرا روڈ)کی یہ تضمین فقیرانہ شان کو اجاگر کررہی ہے

یہ اپنی شان، یہ دولت جہاں کو دکھلانا

"میں اک فقیر ہوں شہر صبا سے آیا ہوں

(صدیق عمر)

۔۔۔۔۔۔۔۔۔۔۔۔۔۔۔۔۔۔۔۔۔۔

قافیہ پیمائی کے خوگر جناب ہنر رسولپوری جب غار حرا سے شعر پڑھ کر آتے ہیں تو ان کا خیال شعر میں کچھ اس طرح اجاگر ہوتا ہے

مرا خیال  گیا  قافیہ کی  چاہت میں

میں شعر پڑھنے کو غار حرا سے آیا ہوں

(ہنر رسولپوری)

۔۔۔۔۔۔۔۔۔۔۔۔۔۔۔۔۔۔۔

سائنسی اور اخلاقی کردار میں ضم ہوجانے والا شعر مولوی اسماعیل قمر صاحب( الہاس نگر) کی زبانی دیکھئے

تو کر اعمال سے، افکار سے پیدا نئی دنیا

تو کر کردار سے اپنے نئی شام وسحر پیدا

(مولانا اسماعیل قمر سوہروی)

۔۔۔۔۔۔۔۔۔۔۔۔۔۔۔۔۔۔۔۔

زیر سے زبر تک کا سفر کامیابی کی علامت ہے، اس سلسلے میں جناب ڈاکٹر نجیب الرحمان نے کیا محسوس کیا ہے اس شعر سے بھرپور اندازہ ہوتا ہے

مجھے آساں عبارت بھی ذرا مشکل سی لگتی ہے 

اگر  میں  زیر  پڑھتا ہوں  تو ہوتا ہے زبر پیدا

(ڈاکٹر نجیب الرحمان)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رفیق کوکنی صاحب نے ماں کی دعا کی تاثیر کو کتنے پراثر انداز میں بیان کیا ہے دیکھئے

مجھے مقام جو حاصل ہے آج دنیا میں

میں اس مقام پہ ماں کی دعا سے آیا ہوں

(رفیق کوکنی)

۔۔۔۔۔۔۔۔۔۔۔۔۔۔۔۔۔۔۔۔۔۔

جہاں ساری تدبیریں فیل ہوجاتی ہیں وہاں صرف جگاڑ سے کام چلتا ہے دیکھئے اس شعر میں جگاڑ دیوبندی نے جگاڑ کا راستہ کیسے تلاش کیا ہے 

جگاڑ کرکے میں آہی گیا ہوں محفل میں

بس اپنا پیچھا چھڑا کر بلا سے آیا ہوں

(ناہید ثمر کاوش جگاڑ دیوبندی) 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

استاد الشعراء جناب نشاط صاحب کو خراج عقیدت پیش کرتے ہوئے بہت سے شعرائے کرام نے اپنے اپنے افکار وانداز میں کلام پیش کئے لیکن مسیح الدین نذیری صاحب کے کلام میں جو درد اور تاثیر کی کیفیت پائی گئی وہ اپنی مثال آپ ہے کچھ اشعار ملاحظہ کیجئے

کرتے ہیں زیادہ بولتے کم ارتضیٰ نشاط

یہ تھے ہمارے پیر حرم ارتضیٰ نشاط

ایسے خبر سنی ہے ترے انتقال کی

جیسے پھٹا ہو کان میں بم ارتضیٰ نشاط

اب کون ہم کو حوصلہ دے گا اڑان کا

اب ہیں مکین باغ ارم ارتضیٰ نشاط

کس نے دیا وقار ادب کو ؟ سوال تھا

میں نے کہا خدا کی قسم ارتضیٰ نشاط

اخلاق ان کا دیکھا جب آئے وہ میرے گھر

بچوں میں ہوگئے مرے ضم ارتضی نشاط

واقعی یہ رنگ مسیح الدین نذیری جیسے کہنہ مشق شاعر کا ہوسکتا ہے  سبھی اشعار میں بلا کی تاثیر اور جاذبیت پائی جارہی ہے 

اخیر میں ایاز بستوی صاحب نے شعری نشستوں کی افادیت پر روشنی ڈالتے ہوئے تمام شعرائے کرام اور سامعین کا شکریہ ادا کیا۔

رپورٹ.  ایاز بستوی

۔۔۔۔۔۔۔۔۔۔۔۔۔۔۔۔۔۔۔۔،