*▪ایوان ادب کی تیسری شعری نشست▪*

*▪ایوان ادب کی تیسری شعری نشست▪*

*۔۔۔۔۔۔۔۔۔۔۔۔۔۔۔۔۔۔۔۔۔۔۔۔*

ایوان ادب" بمقام یاسمین پارک قادر پیلس کوسہ ممبرا ضلع تھانہ (ممبئی) کی تیسری شعری وادبی محفل انعقاد پزیر ہوئی جو مورخہ یکم اکتوبر ٢٠٢٣ بروز اتوار  بڑی کامیابی کے ساتھ  اختتام کو پہونچی ،پروگرام کی  نظامت صدیق عمر صاحب نے انجام دی،اور ممبرا کے مقیم  استاد شاعر اعجاز ہندی صاحب صدر کی حیثیت سے منتخب ہوئے۔

تلاوت قرآن کریم کے بعد مولانا ہارون قاسمی صاحب نے مختصر تقریر کے بعد بالخصوص مرحومین شعراءکرام کے حق میں دعائیہ کلمات اور ایصال ثواب کی رسم ادا کی بعد ازاں  مومن ہندی صاحب نے نعتیہ کلام سے باضابطہ شعری محفل کا آغاز کیا 

اس ماہ اکتوبر ٢٠٢٣ کے اول صاحب اعزاز شاعر ذوالفقار صعیدی صاحب کو منظوم سپاس نامہ،شال ، گلدستہ اور  تسمیم شدہ معیاری قلم سے سرفراز کیا گیا ،"سپاسنامہ" منجانب تنظیم ایوان ادب " قلم" مومن ہندی صاحب  اور شال پوشی کی رسم فخرعالم خان اعظمی صاحب کی جانب سے ادا کی گئی

اس پروگرام کی فہرست میں پچیس شاعروں کے نام شامل تھے جن میں سے تقریباً ۲۱ اکیس شعرائے کرام نے شمولیت اختیار کی اس لئے اختصار کا معاملہ بھی نہیں رہا اسی لئے بڑی آب وتاب کے ساتھ مشاعرہ شام چھ بجے تک چلتا رہا

مشاعرے کی کارکردگی کا مکمل احاطہ اس اجمالی مضمون میں قدرے مشکل ہے البتہ شاعروں کے نمونہءکلام ذیل میں پیش کئے جارہے ہیں تاکہ پروگرام کے شعری رجحانات سے آشنائی ہوسکے۔

شعور کی بالیدگی کے لئے صرف کتابوں کا علم کافی نہیں  بلکہ زندگی کے تجربات آداب زندگی کے سلسلے میں بیحد ضروری ہیں ،دیکھئے صاحب صدر اعجاز ہندی صاحب کا یہ شعر۔ 

*صرف مکتب ہی نہیں جائے ادب دنیا میں*

*زندگی بھی کئی آداب سکھا دیتی ہے *

*(اعجاز ہندی)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جب چراغ شب کی تاریکی میں تھک ہار کر بجھ جاتا ہے ایسے میں جگنووں کی جھلمل امید کی کرن ثابت ہوتی ہے دیکھئے کیا خوبصورت استعارہ ہے 

*ملاکے ہاتھ جگنووں سے رات کاٹنی پڑی* 

*چراغ پاس تھے مگر بجھے بجھے چراغ تھے* 

*(سراج شولاپوری)* 

۔۔۔۔۔۔۔۔۔۔۔۔۔۔۔۔۔

دنیا آزمائش کی جگہ ہے یہ تو طے ہے_ یہاں  پہلے مصرع میں شاعر کا اشارہ کس جانب ہے؟ ، فیصلہ آپ کیجئے ،تیور بہت سخت ہے شعر دیکھئے۔ 

*جانے کیا ہوگیا ہے اس کو بھی*

*جو  سدا  آزما  کے   دیتا ہے*

*(خورشید عالم)*  

۔۔۔۔۔۔۔۔۔۔۔۔۔۔۔۔۔۔۔۔

 اسی ردیف وقافیہ اور اسی بحر میں خورشید عالم کے رنگ میں عالم صابری کا شعر دیکھئے بڑے پتے کی بات ہے 

*وہ  نوالہ   چبا  کے    دیتا ہے*

*یار دھوکا بھی کھاکے دیتا ہے*

*(عالم صابری)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سلیم رشک کا قابل رشک شعر آپ بھی  محسوس کرسکتے ہیں،بہت ہی لطیف شعر ہے، قوت احساس کو تحلیل کرکے سمع میں تبدیل کردینا یہ رشک صاحب کا قابل رشک ہنر ہے 

شعر ملاحظہ کیجئے 

*حسن خیال  کو نہ وہ  جب  تک رسائی دے* 

*پھولوں سے گفتگو ہو نہ خوشبو سنائی دے* 

*(سلیم رشک)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بات میں بات پیدا کرنا مسیح الدین نذیری کا منفرد فن ہے بڑی سادگی کے ساتھ فطری لب ولہجے میں بڑی سے بڑی بات کہہ جاتے ہیں ،انسان اپنوں سے کیسے ہار جاتا ہے یہ شعر پڑھ کر بھر پور اندازہ ہوگا

*مقابلہ  ہو نذیری  کبھی  جب اپنوں  سے*

*تو جیت کر بھی مجھے مات کھانی پڑتی ہے*

*(مسیح الدین نذیری)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تلخ حالات کی سچائی کو بیباکی کے ساتھ بیان کردینا کوئی آسان کام نہیں   ،جب منصف فیصلہ تحریر کرکے قلم توڑ دیتا ہے تو وہ اٹل اور حتمی فیصلہ گردانا جاتا ہے یہ شعر اس معنی کر اپنے قد میں بہت اونچا ہے 

*کوئی بتلائے مرا جرم کہ خود میرے خلاف*

*فیصلہ  لکھتے  ہی  منصف  نے قلم توڑ دیا* 

*(ذوالفقار صعیدی)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایاز بستوی نے اس شعر میں ایک نفسیاتی پہلو کو اجاگر کرنے کی کوشش کی ہے آپ بھی محسوس کر سکتے ہیں 

*اب برستی نہیں ہیں یہ آنکھیں*

*دل  نے  دل ہی  میں  رولیا ہوگا*

*(ایاز بستوی)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غیر منقوط منظوم شاہنامہءاسلام کے مصنف مولانا اسماعیل قمر کا یہ شعر زندگی کی ایک روداد ہے جسے خوبصورت شعری پیکر میں ڈھالا ہے

*تم سے ملنے کے لئے اگلے برس سوچیں گے* 

*آکے پردیس میں جلدی کی دعا کیا مانگیں*

*(مولانا اسماعیل قمر بستوی)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گلدان ،گل اور خوشبو ان تینوں کا امتزاج شعر اگر میں ہوجائے تو قلبی رجحانات حسن فطرت پر مائل بہ کرم ہوجاتے ہیں ، ملاحظہ کیجئے صدیق عمر کا یہ شعر

*یہ تو ہے میرے پاس یا گلدان بہت ہیں*

*خوشبو سے تری جاگتے ارمان بہت ہیں*

*(صدیق عمر)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تہذیب رفتہ کو دور حاضر کی جدید تہذیب نے کس طرح پامال کیا ہے اس کا اندازہ توفیق فاخری کے اس شعر سے لگ سکتا ہے 

*تہذیب کا وہ پہلے سا معیار اب کہاں*

*دور  جدید  گھر کے  سب   آداب لے گیا*

*(توفیق فاخری)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔

جب راستے ہر طرف سے مسدود ہوجائیں تو انسان مالک حقیقی سے مدد کا خواہاں ہوتا ہے اس خیال کو تابش رامپوری نے کس طرح پیش کیا ہے دیکھئے

*ائے  گردش ایام !  کہاں  جائیں بتا دے* 

*آگے بھی خلا ہے مرے پیچھے بھی خلا ہے*

*(تابش رامپوری)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یقینا مومن ہندی کی شاعری تاریخی پہلوؤں سے اجاگر ہے اس شعر میں دیکھئے قلم کو عصا سے کس خوبصورتی سے تعبیر کیا ہے  اسی لئے اس شعر میں تاریخ کا فلسفہ پوری طرح رونما ہے ،ملاحظہ کیجئے

*اگر  اخبار  جادوگر  ہیں  سارے*

*قلم بھی اک عصا ہے اور میں ہوں* 

*(مومن ہندی)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شاعری وہی مطلوب ہے جو زمینی حقائق سے مربوط ہو یہ کمال اگر دیکھنا ہے تو کمال فرخ آبادی کو دیکھئے ،موصوف کی زندگی اور شاعری دونوں تصنع سے پاک ہے یہ شعر اس بات کی ترجمانی کررہا ہے

*ہم  نے  ہر  شعر  کہا اپنی ہنرمندی سے* 

*ہم  وہ شاعر ہیں  جو  تقلید نہیں کرسکتے*

*(کمال فرخ آبادی)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تاریخی حیثیت پر اسلامی طرز فکر کی شاعری اگر سرزمین ممبرا کی حد تک دیکھنی ہو تو فخرعالم خان اعظمی کے روبرو ہونا پڑے گا وہ کہتے ہیں 

*رستم کی بات کر نہ سکندر کی بات کر* 

*حامی  ہے  دین  کا  تو پیمبر  کی بات کر*

*(فخر عالم خان اعظمی)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فیصل ماررولوی صاحب کا یہ شعر اس حدیث کی ترجمانی کرتا ہے جس میں پڑوسی کے حقوق کی پاسداری اور اہمیت بتائی گئی ہے، ملاحظہ کیجئے 

*حالات  سے  دنیا کے  تو واقف ہو بہت تم*

*کچھ اپنے پڑوسی کی خبر ہے کہ نہیں ہے*

*(فیصل مارولوی)* 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یاسر اعظمی نے ماں کی عظمت کو کس خوبصورتی سے بیان کیا ہے آپ اس شعر سے اندازہ کرسکتے ہیں 

*روٹھتا ہے گر زمانہ روٹھ جائے غم نہیں*

*روٹھ جائے  ماں اگر  فوراً منانا چاہئیے* 

*(یاسر اعظمی)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

جفاکشی جب انسان کی طبیعت کا حصہ بن جائے تو اس کی زندگی اس مصرع کی مصداق بن جاتی ہے " تڑپ ائے دل تڑپنے سے ذرا تسکین ہوتی ہے" اسی خیال کو ڈاکٹر نجیب الرحمٰن نے دوسرے انداز سے  باندھا ہے دیکھئے

*بحر الم  سے  بچ  کے  نکلنا نہیں کمال*

*دل ڈوب جائے جس کا وہی کامیاب ہے*

*(ڈاکٹر نجیب الرحمٰن*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

حافظ منعمی صاحب کا  یہ شعر دیکھئے جس میں حضرت یوسف اور جیل کو علامت کے طور پر استعمال کرکے موجودہ حالات سے کس طرح جوڑا ہے 

*دنیا ہے یہ دنیا کا ہے دستور الگ جی*

*یوسف کو یہاں جیل میں جانا ہی پڑے گا*

*(حافظ روح اللہ منعمی)*

۔۔۔۔۔۔۔۔۔۔۔۔۔۔۔۔۔ ۔۔۔۔

دنیا کی حقیقت سب کے روبرو ہے یہ سب کو معلوم ہے کہ دنیا آزمائش کی جگہ ہے اس تصور کو جب ایک شاعر اپنے شعر کے آئینے  میں لاتا ہے تو کیسا محسوس ہوتا ہے ملاحظہ کیجئے

*ہمارے ہی لئے دنیا سجی ہے*

*ہمی  کو   آزمایا   جارہا  ہے*

*(رفیق چوگلے)*  

۔ ۔  ۔۔۔۔۔۔۔۔۔۔۔۔۔۔۔۔۔۔۔۔۔

جگاڑ صاحب کے جگاڑ کا سلسلہ کبھی منقطع نہیں ہوتا یہاں بھی  ان کا جگاڑ برقرار ہے ،شعر پڑھ کر جگاڑ صاحب کو یہ دعا ضرور دیں کہ "خدا محفوظ رکھے اس بلا سے" لیجئے شعر پڑھئے اور سر پیٹئے۔ 

*کچھ نہیں ہے تو پڑوسن کا دوپٹہ ہی سہی* 

*راہ  میں  سایہء دیوار  ملے  یا  نہ  ملے*

*(جگاڑ دیوبندی)*

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

  صاحب صدر اعجاز ہندی صاحب کے صدارتی خطبے کے ساتھ ٹھیک شام چھ بجے پروگرام اختتام پزیر ہوا ،ایوان ادب کے منتظم خاص جناب ذوالفقار صعیدی نے شعرائے کرام اور سامعین کا شکریہ ادا کیا 

اب یہ پروگرام اگلے ماہ کے پہلے اتوار تک کے لئے ملتوی کردیا گیا ہے اور اگلے ماہ کا پروگرام طرحی ہوگا ،سبھی اہل ذوق سے شمولیت کی درخواست ہے 

*پھر ملیں گے اگر خدا لایا* 

۔۔۔۔۔۔۔۔۔۔۔۔۔۔۔۔۔۔۔

*بہ شکریہ منتظم خاص  ذوالفقار صعیدی صاحب و جملہ عہدیداران و اراکین ایوان ادب*

*رپورٹ ۔ ایاز بستوی* 

*==================*